Azərbaycan dili dialektlərində və türk dilində işlənən ortaq sözlər

Kitabın Azərbaycan dilçiliyində, ümumi türkologiyada, habelə müqayisəli, çoxdilli lüğətlərin hazırlanmasında nəzəri və praktik əhəmiyyəti vardır.Tədqiqat Azərbaycan dilinin dialekt leksikasının türk ədəbi dilinin leksikası ilə müqayisəli şəkildə öyrənilməsi sahəsində çox əhəmiyyətlidir.Bu səbəbdən aktuallıq kəsb edən həmin mövzunun müqayisəli tarixi səviyyədə öyrənilməsi, qohum dillərin tarixi inkişafı və müasir vəziyyəti haqqında bilik və təsəvvürləri xeyli genişləndirə bilər. Azərbaycan dilinin dialektlərini türk ədəbi dili ilə qarşılaşdırmamın səbəbi ortaq elementləri aşkar edərək bu iki dilin tarixi əlaqələrini, qarşılıqlı təsir xüsusiyyətlərini ortaya çıxarmaqdır. Tədqiqatın obyektini Azərbaycan dili dialektlərinin materialları, tədqiqatın predmetini isə Azərbaycan dilinin dialekt leksikasında ortaq sözlərin leksik-morfoloji təhlili təşkil edir. Azərbaycan dili dialektləri ilə türk ədəbi dilinin qarşılaşdırılması türk dillərinin daha dərindən araşdırılması üçün faydalı ola bilər və bundan elmi mənbə kimi istifadə etmək mümkündür.Bir-birinə tarixi kökləri ilə bağlı olan bu dillərin, müqayisəli şəkildə öyrəninilməsi Azərbaycan dilçiliyi üçün mühüm əhəmiyyət kəsb edir.