Stres zamanı qarğıdalı bitkisində tənəffüsün energetik effektivliyi

Son illərdə bitkilərin quraqlılığa və duza davamlılığı məsələsi Bitki fiziologiyasında ən çox öyrənilən elm sahələrindən biri olmuşdur. Bitkilərin su çatışmazlığı və şoranlaşmanın yaratdığı fəsadların elmi əsasları geniş tədqiq olunsa da bu sahədə araşdırmalara ehtiyac hələ də qalır. Quraqlıq və duz stresləri bitkilərin inkişafına və məhsuldarlığına təsir edən ən geniş yayılmış mühit amillərindən biri olmaqla, bitkilərdə bir çox morfoloji, fizioloji, biokimyəvi və molekulyar səviyyədə induksiya olunmuş cavab reaksiyaları yaradır, bitkilərin əlverişsiz mühit şəraitinə adaptasiya olunmaq üçün onlarda tolerant mexanizmlər formalaşdırır. Bu mexanizmlərin öyrənilməsi, əlverişsiz xarici mühit amillərinə qarşı davamlı bitki sort və formalarının yaradılmasında böyük nəzəri və təcrübi əhəmiyyət kəsb edir.