Ekologjia e kultures

Shkrimet e këtij libri përmbajnë një ndërgjegje të shqetësuar shprehur nëpërmjet kritikës sociale, në funksion të zhvillimit dhe integrimit europian të vendit. Çfarë duhet të njohim, të trajtojmë e të mirëmbajmë nga kjo kulturë, çfarë duhet të sendërtojmë nga perspektivat e saj kombëtare dhe sa hapësirë duhet t’i lëmë asaj në përfaqësimin tonë dinjitoz, janë disa nga sfidat që kërkojnë arsyen dhe guximin kolektiv të njeriut të sotëm modern. Pikërisht mbi këto çështje është motivuar edhe struktura e këtij libri. Ruajtja e trashëgimisë popullore, zhvillimi dhe shfrytëzimi i saj si resurs turistik, është gjithashtu pjesë e këtyre trajtesave. Hapja e shtigjeve të reja në zhvillimin ton perspektiv, është një obligim fisnik për secilin nga ne dhe të gjithë së bashku, jemi të ftuar nga detyra e brezave, të vendosim tullat e radhës në godinën e kësaj kulture. Po kaq shqetësuese është edhe ekologjia e kulturës e cila rrezikohet nga “viruset” e vulgarizmit dhe banalitetit, përkundër kontributeve tona historike, të cilat janë dëshmi e sakrificave sublime të paraardhësve tanë.