Azərbaycan Tarixinin Ədəbiyyatla əlaqəli Tədrisinin Mahiyyəti

Hal-hazırda təhsil sistemində tarix elminin qarşısında mühüm vəzifələrin həlli dayanır. Sürətlə dəyişən, yeniləşən dünyanın dərk edilməsi, yaradıcı düşünməyi bacaran şəxsiyyətlərin tərbiyə edilməsi bu prosesdə ön plana çəkilmişdir. Dünya təhsil sistemindəki mühüm yeniliklərin faydalı tərəflərini bizim cəmiyyətə uyğun şəkildə ümumiləşdirib tətbiq etmək pedaqogika elminin əsas vəzifələrindən birinə çevrilmişdir. Müasir dövrdə müxtəlif təlim metodlarından istifadə etməklə şagirdlərdə tarixi bilikləri formalaşdırırıq. Ən etibarlı bilik mənbələrinə : dərslik, tarixi sənədlər, qəzet, jurnallar, elmi-kütləvi ədəbiyyatlar, tarixə dair qiraət kitablari və s aid edilir. Bədii ədəbiyyat şagirdləri tarixi keçmişlə tanış etməyin ən mühüm üsullarındandır. Tarix fənninin öyrənilməsində bədii ədəbiyyatda verilən tarixi sürətlər, şagirdlərin hafizəsində öyrəndikləri materialların məzmununu daha da möhkəmlənməsinə kömək edir. Bununla yanaşı tarix fənninin tədrisi təcrübəsi göstərir ki, bədii ədəbiyyat əsərləri şagirdləri sinifdənkənar işə, müstəqil oxuya, mütaliə və analizə sövq edir.