Termin və terminologiyanın ümumi məsələləri

İctimai həyat təkmilləşdikcə dil də inkişaf edir. Dilin inkişaf etməsinin əsasını həmin dildə danışan xalqın tarixi, eyni zamanda cəmiyyətin tərəqqisi təşkil edir. Hər bir dilə məxsus sözlərin ilk dəfə hansı mənada işlədilməsi, necə yaranması və həmin sözlərin inkişaf tarixinin öyrənilməsi vacib olan məsələlərdəndir. Hər hansı bir dilin leksikası keçdiyi inkişaf tarixini özündə əks etdirir. Məhz bu səbəbdən də dildə yeni yaranan anlayışlar öz əksini terminlər, sözlər şəklində tapır. Termin nədir? “Termin” adlandırılan sözlər dildəki leksik vahidlərdən hansı xüsusiyyətlərinə görə fərqlənir? “Termin” sözü mənşə etibarilə “terminus” sözündəndir. “Terminus” sözü latınca hədd, hüdud, sərhəd deməkdir.Terminlər elm və texnika, incəsənət və mədəniyyət sahəsində işlədilən müxtəlif məfhumları və anlayışları dəqiq ifadə edən sözlər və söz birləşmələridir.Termin sözdür, lakin dildə olan bütün sözləri termin adlandırmaq olmaz. Çünki terminlər müasir elmin, texnikanın, incəsənətin və mədəniyyətin müxtəlif sahələrindəki xüsusi anlayışların ifadəçiləri olmaq etibarilə dildə olan ümumişlək sözlərdən bir çox xüsusiyyətlərinə görə fərqlənir.