Oxucuların fatehi Çingiz Abdullayev

Azərbaycanın Xalq yazıçısı Çingiz Abdullayev ədəbi mühitdə kifayət qədər tanınan yaradıcı şəxsdir. O, novator yazıçı kimi Azərbaycan ədəbiyyatına yeni - siyasi detektiv janrını gətirərək, bu sahədə gənc yazarların yetişməsinə rəvac verdi. Çingiz Abdullayevin adı çəkiləndə yada ilk növbədə məşhur “Mavi mələklər” əsəri düşür. Bu əsər Xalq yazıçısının yaradıcılığında bir möhür kimi tanınır. Əsər ilk dəfə işıq üzü görəndə oxucular sanki həmin kitabın ovuna çıxmışdılar. Ərsəyə gətirdiyi əsərlərin sayəsində o, qısa zamanda nəinki Azərbaycanda, o cümlədən Rusiya, Orta Asiya və Şərqi Avropa ölkələrində ən çox oxunan müəlliflərdən biri kimi tanınmağa başladı. Bu onun istedadının tükənməz və məhsuldar olduğundan xəbər verir. Müəllifin bir neçə romanı beynəlxalq kino mütəxəssisləri tərəfindən ekranlaşdırılıbdır. Maraqlı cəhət ondan ibarətdir ki, yazıçının isteda-dına bütün sahələrdə çalışan adamlar, yəni arabaçıdan tutmuş dövlət başçılarına kimi maraq göstərirlər. Hazırda onun əsərləri üçün heç bir sərhəd yoxdur. Ona görə ki, Bakıda yazılan hər bir kitab dünyanın 5 qitəsində yaşayan xalqların qəlbinə yol tapıbdır. Bu uğurlu nailiyyətə görə Ç. Abdullayevi qəlblərin fatehi adlandırmaq olar.