ТАЪЛИМ ВОСИТАЛАРИ – ТАЪЛИМ ТЕХНОЛОГИЯЛАРИНИНГ ТАРКИБИЙ ҚИСМИ

Ўқитиш жараёнида таълим воситалари ва уларни мақсадли, ўринли ва самарали қўллай олиш муҳим аҳамиятга эга. Таълим мақсадида қўлланиладиган барча техник қуроллар ва кўрсатмали материаллар таълим воситалари бўлиб, улардан фойдаланиш таълимнинг асосий мақсади – қисқа муддатда юқори самарадорликка эришиш учун зарур шарт-шароитни юзага келтиради. Шахс томонидан муайян мақсад йўлида амалга оширилиб, самарага эришиш йўлида қўлланиладиган иш қуроллари “восита” деб номланади. Восита (а. “восидат” – чора, тадбир, усул, ўрта, ўртадаги) – муайян мақсадга эришиш учун қўлланиладиган нарса, қурол; маълум ҳаракат, фаолиятнини амалга оширишда фойдаланиладиган нарса.Таълим воситаси – таълим мақсадига эришиш учун қўлланиладиган қурол; таълимий ҳаракат, фаолиятни амалга оширишда фойдаланиладиган нарса.