Туризм индустриясының экономикалық-географиялық даму факторлары

Туризмді зерттеудің өзектілігі бұл біріншіден туризмнің даму потенциалына баға беретін белгілі бір әдістің болмауы болса екіншіден туризм саласының күрделілігімен түсіндіріледі. Маңызды тенденция болып мәдени танымдық туризмге қызығушылығы артқан туристер санының көбеюі есептеледі. Осыған байланысты қазіргі кезде тарихи – мәдени ескерткіштерге бай аймақтар әлемдік туристік картада қарқынды түрде пайда болуда. Осындай аймақтардың қатарына кіруге Ақтөбе облысының да потенциалы жоғары деп айтуға негіз бар. Өйткені Ақтөбе облысы тарихи мұралармен қатар табиғи мұраларға да бай болып табылады. Ресурстық қорға қарамастан Ақтөбе облысын дәстүрлі туристік аймақ деп атауға келмейді. Сондықтан облыста туристік сфераны ұйымдастыру да, туристік потенциалды пайдалану да зерттеу жұмыстарын талап етеді. Қазақстан Республикасында туризмді дамыту - стратегиялық маңызды сатылардың бірі болып табылады. Қазіргі кезде қоғамның үздіксіз дамуы қай жағынан алып қараса да экономикалық және әлеуметтік даму тенденцияларын бірге дамытып өзгертіп отырады, бұл өз кезеңінде туризмге де әсер етеді.