ЎЗБЕК ОИЛАЛАРИДА ИЖТИМОИЙ-МАДАНИЙ ЖАРАЁНЛАР ТРАНСФОРМАЦИЯСИ

Дунё илм-фани тараққиётида оила маънавий маданиятнинг асоси, шахс ижтимоий маданийлашувининг ижобий кечишини таъминловчи муҳит ҳамда қадриятлар ва анъаналарни ифода этувчи маскан сифатида ўрганилади. Оилагина жамиятни констант ҳолатда сақлаб қолади, оила инсон онгида бошқа қадриятлар ўртасида етакчи ўринни эгаллаб, шахсий ҳаёт ва ижтимоий муносабатлар орасидаги мувозанатни таъминлайди. Бугунги шароитда оила ўз ривожланишининг қийин, ноаниқ даврини бошдан кечирмоқдаки, бу бир томондан, ижтимоий-иқтисодий омиллар таъсири остида, иккинчи томондан, оилада содир бўлаётган ички жараёнлар таъсири остида содир бўлмоқда ҳамда бундай ўзгаришлар шахс, жамият ва давлат ҳаётидаги жараёнларга таъсир этади.