ƏSƏRLƏRİNDƏ YAŞAYAN SƏNƏTKAR TANRIYEL HƏSƏNOĞLU

“ƏSƏRLƏRİNDƏ YAŞAYAN SƏNƏTKAR TANRIYEL HƏSƏNOĞLU” kitabında Gürcüstanın Qardabani (Qarayazı) rayonunda dünyaya göz açmış, Tbilisi Moisey Toidze adına Rəssamlıq məktəbinin məzunu Tanrıyel Həsən oğlu Əliyevin sirlər, möcüzələr və kəramətlərlə dolu olan əsrarəngiz sənət inciləri yer almışdır. 1988-ci ildən Türkiyədə məskunlaşmaqla mühacirət həyatına başlayan Tanrıyelin taleyinin Manavqat şəhəri ilə bağlaması “alın yazısı” – Allahın lütfü hesab etmək olar. Bu gün Manavqatdakı Dədəxan Mədəniyyət Evinin Sənət Qalereyasında nümayiş etdirilən və müəllifin yaradıcılığı üçün “yeni səhifə” kimi dəyərləndirdiyimiz 60-a qədər tablosu sözün əsl mənasında milli bədii-mənəvi irsimizə böyük töhfədir. Uzun illər ərzində məhz bu unikal rəngkarlıq nümunələrinin sayəsində Türkiyənin turizm mərkəzlərindən hesab olunan Manavqatın diqqətçəkən və qələbəlik duyulan mədəniyyət ocağına çevrilməsi də hamının etiraf etdiyi həqiqətdir. Artıq əbədiyyətə qovuşmuş Tanrıyel Əliyevin nadir sənət əsərlərinin toplanıb bir araya gətirilməsi, sərgilərinin təşkili, Azərbaycan xalqına tanıdılması, Gürcüstanın və Azərbaycanın mədəniyyət nazirliklərinin, rəssamlıq ittifaqlarının, mədəniyyət qurumlarının üzərinə düşür.