КРЕИРАЊЕ СИСТЕМ ЗА НАГРАДУВАЊЕ МЕНАЏЕРИ И ВРАБОТЕНИ

Предмет на истражување во овој труд е стратегискиот пристап во наградувањето како активност на менаџментот со човечките ресурси во организациите и креирањето систем за наградување во функција на зголемување на индивидуалните и севкупните перформанси на компанијата. Централен проблем на истражувањето е недостигот на техники, знаења и волја за имплементација на систем за наградување во компаниите од областа на преработувачката индустрија со посложено уредување, што се манифестира како пречка за поттикнување на развојот на компанијата, обезбедување на нејзината конкурентска позиција и зголемување на продуктивноста и финансискиот резултат. Исто така, отсуствуваат и истражувања за генерално прифатлив систем за наградување во акционерските друштва кој ќе делува мотивирачки врз човечкиот потенцијал, директно стимулирајќи ги лојалноста и работниот учинок. Во таа смисла, фокусот на ова истражување е ставен на акционерските друштва од преработувачката индустрија, со можност за негова широка примена, како во приватниот, така и во јавниот сектор.