Хавфли ўсмалар эпидемиологияси ва онкологик ногиронлик таҳлили

Хавфли ўсмалар эпидемиологиясини ўрганишдан асосий мақсад ушбу касаллик турли шаклларининг тарқалиш қонунияти, этиологик ва патоген омиллар таъсири орасидаги боғлиқликни, қолаверса касалликнинг юзага чиқиши, касалланиш ҳамда ўлим частотаси ортиши ёки пасайишини ўрганиш асосий мақсадлар деб ҳисобланади. Натижада эпидемиологик тадқиқотлар бир томондан саратоннинг айрим шакллари этиопатогенетик моҳиятини (ёки уни янги маълумотлар билан бойитишни) очиб бериш, иккинчи томондан саратонга қарши курашишда аниқ маълумотлар билан соғлиқни сақлаш тизими ташкилотчиларини қуроллантириш, аҳоли саломатлигини шакллантириш учун омиллар, шароит ва бошқарилаётган жараённи назорат қилишга имкон беради. Хавфли ўсмалар замонавий жамиятнинг ўта мураккаб тиббий-ижтимоий муаммоларидан бири ҳисобланади. Саратонни ўрганиш бўйича ҳалқаро агентлиги (IARC-International agency for research of cancer) маълумотларига кўра, дунёда хавфли ўсмалар билан касалланиш ҳозирги кунда 1 йилда 18 млндан 2030 йилга келиб 30 млнга кўпайиши кутилмоқда. Шу билан бирга касалликдан ўлим даражаси йилига 9 млн дан 12 млнга кўпаймоқда.